Устав купеческого общества «Иванского ста» при церкви Ивана Предтечи на Опоках в Новгороде (XIIв.)

 Один из первых дошедших до нас уставов древнерусских купеческих объединений (1127-1136гг.)

 Датируется по строительству церкви Ивана Предтечи - после 1127 года и до 1136 года - году изгнания князя Всеволода Мстиславича из Новгорода.

Се аз князь великий Гаврил, нареченный Всеволод самодеръжець Мьстиславич, внук Володимир, владычествующю ми всею Рускою землею и всею областью Новгороцкою, Божим благоволением поставил есьми церков святый великый Иван на Петрятине дворице и устроил есми ю иконами многоценными и всеми книгами исполнь, устроил есьми попы и дьяконы в зборной великой церкви.

И даю святому великому Ивану от своего великоимения на строение церкви и в векы вес вощаной, а в Торжку – пуд вощаной, половина святому Спасу, а половина святому великому Ивану на Петрятино дворище. А оброка попом и дьякону и сторожам из весу вощаного имати: попом по осьми гривен серебра, а дьякону четыре гривны серебра, а дьяку три гривны серебра, а сторожам три гривны серебра.

И яз князь великий Всеволод поставил есми святому Ивану три старосты от житьих людей и от черных тысяцкого, а от купцев два старосты, управливати им всякие дела иванская и торговая и гостинная и суд торговый. А Мирославу посаднику в то не вступаца и иным посадником в ываньское ни во что же, ни боярам новгороцкым.

А хто хочет в купечество вложиться в ыванское, даст купьцем пошлым вкладу пятьдесят гривен серебра, а тысяцкому сукно ипьское, ино купцам положить в святой Иван полтретьяцать гривен серебра. А не вложиться хто в купечьевство, не даст пятьдесят гривен серебра, ино то не пошлый купець. А пошлым купцем ити им отчиною и вкладом. А вести им в притворе святого Ивана, где дано, ту его и дръжати.

А вести старостам иваньским, двема купцем пошьлым, добрым людем, а не пошлым купцем старощениа не дръжати, ни весу им не вести иваньского. А у гостя имимати: у Низовьского от дву берковска вощаных полъгривне серебра да гривенка перцю, у полоцкого и у смоленьского по две гривны кун от берковъска вощаного, у новоторжанина полторы гривны от берковъска вощаного, у новгородца шесть мордок от берковска вощаного. А куны им класти святого великого Ивана в дом, что вывесят, по правому слову. А новгородцю не вести ни на которого гостя.

А по моем животе великого князя Всеволода стояти за дом святого великого Ивана брату моему великому князю всея Руси и владыце новгородскому и старостам купецьким и купцам и за вся церковникы святого Ивана. А взять князю великому из весу вощаного полтретьяцать гривен серебра через год.

А в дому святого Ивана не дръжати никому ничего же, развее свечи и темьяна. А городу ни владыце ни боярам весу не отъимати у святого великого Ивана, ни продавати моего данья великого князя Всеволода. А хто почнет вес отъимати или продавати или дом обидити святого великого Ивана и святого Захарьи, на того Спас и Пречистая и святый великий Иван. Будет им тьма и съблазн и казнь божия.